«Մոնա Լիզան» արվեստի աշխարհի ամենահայտնի գործերից է, որը վերստեղծել են տերևներից ու նույնիսկ մանրէներից։ Եվ ահա Ճապոնիայի Ֆուկուոկա խոհարարական դպրոցի սաները վերստեղծել են «Մոնա Լիզան»՝ հացի 2200 կտոր օգտագործելով, հայտնում է NDTV-ը։

2,4 մետր բարձրությամբ ու 1,5 մետր երկարությամբ «կտավը» ստեղծվել է տարբեր երանգների հացի կտորներից՝ սևից մինչև սպիտակ։ Շագանակագույն երանգը ստացվել է կակաոյի փոշի օգտագործելու միջոցով:

«Մեզ հաջողվել է վերստեղծել կտավը հացի տարբեր բնութագրիչների շնորհիվ։ Օրինակ, որոշ երանգներ կարելի է ստանալ հացը տարբեր ջերմաստիճաններում տաքացնելու շնորհիվ», - ասում է նախագծի հեղինակ Ակարի Նագատան։